ایک دن سید انشاء نواب آصف الدولہ صاحب کے ساتھ بیٹھے کھانا کھارہے تھے۔ گرمی سے گھبرا کردستار سر سے اتار کر رکھ دی تھی۔ منڈا ہوا سر دیکھ کر نواب صاحب کی طبیعت میں چہل آئی، ہاتھ بڑھا کر پیچھے سے ایک دھول ماری۔ انشاءؔ نے جلدی سے ٹوپی پہن لی اور کہنے لگے، ’’سبحان اللہ بچپن میں بزرگوں سے سناکرتے تھے، وہ بات سچ ہے کہ ننگے سر کھانا کھاتے ہیں تو شیطان دھولیں مارتا ہے۔

 ( فہیمہ  انعام راول پنڈی )

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک مرتبہ ایک شخص خلیفہ ہارون الرشید کے پاس آیا اور اس سے کہا، مجھے حج پر جانا ہے۔ میری امداد کریں۔ خلیفہ نے کہا، دیکھو بھائی! اگر تم صاحب نصاب ہو تو ضرور حج کرو، ورنہ حج کیوں کرتے ہو۔

یہ سن کر اس نے کہا:

"میں آپ کو بادشاہ سمجھ کر امداد طلب کرنے آیا تھا، مفتی سمجھ کر فتویٰ پوچھنے نہیں۔"  (انعم سلیمان حیدر آباد )

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لوگ29 رمضان کو  عید کا چاند دیکھنے کی کوشش کررہے تھے۔ ایک بڑے میاں نے آسمان کی طرف دیکھا تو وہاں بادل نظر آئے۔ سردآہ بھر کر بولے:” واہ اﷲ میاں! اپنی باری پر تیز دھوپ اور ہماری باری پر یہ بادل۔“ (محمد اسلم نوشہرہ)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک بار مشاعرہ ہورہا تھا۔ ایک  استاد شاعر  نے طرح کاایک مصرعہ دیا:

’’چمن سے آرہی ہے بوئے کباب‘‘

بڑے بڑے شاعروں نے طبع آزمائی کی لیکن کوئی گرہ نہ لگا سکا۔  ایک شاعر نے قسم کھالی کہ جب تک گرہ نہ لگائیں گے، چین سے نہیں بیٹھیں گے۔  وہ ہر صبح دریا کے کنارے نکل جاتے اونچی آواز سے الاپتے:

’’چمن سے آرہی ہے بوئے کباب‘‘

ایک روز ادھر سے ایک کم سن لڑکا گزرا جونہی شاعر نے یہ مصرعہ پڑھا، وہ لڑکا بول اٹھا۔ 

کسی بلبل کا دل جلا ہوگا

شاعر نے بھاگ کر اس لڑکے کو سینے سے لگایا۔ یہی لڑکا بڑا ہوکر جگر مرادآبادی کے نام سے مانا ہوا شاعر بنا۔ ۔  (غلام رسول  کراچی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پروفیسر صاحب کو کہیں لیکچر دینے جانا تھا ، تیاری میں دیر ہو گئی ،  نکلنے لگے تو بیوی نے کہا   : جناب پان تو لیتے  جائیے !!  پروفیسر واپس پلٹے بیگم کے ہاتھ سے پان لیا اور تیزی سے دروازے کی طرف بڑھنے لگے ، بیوی نے پھر آواز لگائی ارے صاحب جو تے :

پروفیسر بولے : بیگم دیر ہو رہی ہے واپسی میں کھالوں گا ۔ (فرحت اقبال ملتان)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پانچ سالہ وقاص اپنے ہم عمر دوست  سلمان کو بتا رہا تھا : ہمارے گھر  ایک منا سا بھائی آنے والا ہے ۔

سلمان نے پوچھا تمہیں کیسے اتنا یقین ہے کہ بھائی ہی ہوگا ؟

وقاص نے جواب دیا: یہ بھی کوئی مشکل بات ہے کچھ مہینے پہلے  امی بیمار ہو کر اسپتال گئی تھیں تو منی آئی تھی  ، اب ابو بیمار ہو کر اسپتال گئے ہیں تو منا ہی آئے گا نا !!!

(ارشد حسین کراچی )

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک خاتون نے ماہر ڈاکٹر کو مسلسل  دس  منٹ تک  بولتے ہوئے اپنے  جبڑوں  اور گلے کے درد  کی تفصیل بتائی   ، ڈاکٹر نے سب کچھ سننے کے بعد صرف ایک جملہ کہا :محترمہ آپ کو آرام کی ضرورت ہے ۔

خاتون نے کہا : مگر  سر آپ نے میری زبان تو دیکھی ہی نہیں

ڈاکٹر نے کہا : اسی کو آرام کی ضرورت ہے (شمیم اختر کراچی )